Шаҳноза Назирова, маъруф ба Шаҳнози Беназир, аз намоёнтарин чеҳраҳои ҷавон дар адабиёти тоҷик аст. Вале ду соли пеш дар маҳфиле бахшида ба рӯзи Ваҳдати миллӣ аз сӯйи раиси ҷумҳур ба унвони нафари шоиста барои кор дар мансабҳои давлатӣ муаррифӣ шуд. Пас аз ин, ӯро ба симмати муовини раиси Кумитаи кор бо ҷавонон, варзиш ва сайёҳӣ пазируфтанд. Шаҳноз дар ин вазифа тақрибан ду сол кор кард. Аммо шаш моҳ пештар аз ин, вазифаеро, ки бо мусоидати раиси ҷумҳур ба он даст ёфта буд, раҳо карда ба Амрико рафт. Феълан дар шаҳри Денвери иёлати Колорадои ИМА ба сар мебарад. Танҳо не, ҳамроҳи ҳамсараш. “Элита” тавонист, ки Шаҳнозро ҳам ба сари суфраи нахустин шумораи худ даъват кунад ва аз ӯ дар бораи рӯзу рӯзгораш дар Амрико пурсад: КОЛОРАДО Ё ТОҶИКИСТОН?
-Обу ҳавои иёлати Колорадо ба иқлими Тоҷикистони азиз бисёр монанд аст. Он низ дар минтақаи кӯҳӣ ҷой гирифта, дар фасли тирамоҳ хеле ҷаззоб мешавад. Зеро дар ин фасли сол гулу сабзаву дарахтонро муззайян бо зеботарин рангҳои мавҷуд хоҳед дид.
Ногуфта намонад, ки дар ин иёлат низ теъдоди қобили таваҷҷӯҳ аз ҳисоби шаҳрвандону донишҷӯёни тоҷик кору зиндагӣ мекунанд. Вақте сухан аз иёлати Колорадо ва тоҷикони муқими он ҷо меравад, наметавон исми яке аз шаҳрҳои зебояш - Болдерро ба забон наёвард. Азбаски бо талоши мақомоти шаҳдории Душанбеву Болдер дар он ҷо яке аз шоҳкориҳои дастони ҳунарманди тоҷик бинои “Чойхонаи тоҷикӣ” қомат афрохтааст ва тамоми ҷашну маросимҳои муҳим дар он маҳал барпо мешавад. Аз ҷумлаи иди Наврӯз, ҷашни истиқлолият...
АЗ ИНГЛИСӢ ТО СИЁСАТШИНОСӢ
-Аммо феълан дар Амрико ба чӣ кор машғулед?
-Дар ҳоли ҳозир дар коллеҷи амрикоӣ забони инглисӣ меомӯзам. Албатта, донишам дар ин замина чандон бад набуд, аммо акнун мехоҳам имтиҳони TOEFL-ро низ бомуваффақият супорам. Дар канори ин, омӯзиши маводи кори илмиамро дар риштаи сиёсатшиносӣ пайгирӣ мекунам. Қабл аз сафар ба Амрико бо кӯмаки устодонам Сайфуллои Сафар ва Абдулвоҳиди Шамол имтиҳони вурудро барои ҳимояи номзадӣ супорида будам. Ҳоло мехоҳам аз ин фурсат ба андозаи кофӣ истифода кунам ва вақтамро талаф насозам.
Ба ҷуз ин моҳе як бор дар маҳфили фарҳангии эрониёни муқими Колорадо ҳамроҳи ҳамсарам ширкат карда, дар он саҳми худро ба намояндагӣ аз Тоҷикистон мегузорем. Ҳамчунин дар ташкил ва баргузории маъракаҳои мухталифи иҷтимоӣ ва сиёсиву фарҳангие, ки дар бастагӣ ба Тоҷикистон дар шаҳри Болдер баргузор мешавад, фаъолона иштирок мекунем.
ДАРДИ ЭҶОДКОР
-Зиндагии дур аз Ватан барои як фарди эҷодкор ба чӣ навъе пушти сар мешавад? Оё мушкил нест?
-Ба назари ман, дурӣ аз ватан барои ҳар як фарди бедордилу ватандӯст бениҳоят мушкил аст. Аммо барои нафари эҷодкор ин мушкил чандин карат афзунтар мегардад. Аз тарафи дигар, ин марҳила низ дар умри одам марҳилаест ҷолиб, ки аз он метавон хеле чизро омӯхт. Чунки зиндагӣ дар қитъаи дигар миёни мардуми дорои фарҳангу тамаддуни бегона пеши рӯи инсони мутафаккир имконот ва фурстаҳои навро боз мекунад.
МИЁНИ КОР ВА ЗИНДАГӢ
-Шуморо худи раиси ҷумҳур ташвиқ карда буд, ки дар як мансаби давлатӣ кор кунед. Ин мансабро худатон гузошта рафтед ё Шуморо аз ин вазифа “холӣ” карданд?
-Ман аз тақдири худ воқеан миннатдорам, ки аз ҳимоят ва ташвиқи бевоситаи худи раиси ҷумҳур бархӯрдор будам ва ин амали эшон дар таърихи ҷумҳур собиқае надошт. Дар тӯли фаъолияти дусолаи худ дар идораи давлатӣ бори ин масъулияти азимро эҳсос мекардам. Ва ҳар вақте ки дар коре тасмим мегирифтам, талош менамудам, то тасмимам ба ҳадди лозим ба манфиати ҷавонони кишвар бошад. Уммед дорам, дар ин ҷода то ҷое муваффақ ҳам бошам.
Бовар дорам, агар афроди соҳибқудрати дигар дар манотиқи гуногуни кишвар монанди раиси ҷумҳур рафтор карда, аз ҷавонони таҳсилкардаву бофазилат пуштибонӣ намоянд, давлати навбунёди мо ободтар хоҳад шуд.
Ҳангоми таҳсил дар донишгоҳи Теҳрон тамоми фикру зикрам машғули андӯхтани илму дониш буду бас. Пас аз хатми он пешниҳоди хостгорони барӯманди эрониро рад карда, ба Тоҷикистон баргаштам. Зеро модарам ба пайравӣ аз бобоям ман ва бародарамро дар рӯҳияи садоқати комил ва посдорӣ аз арзишҳои миллӣ тарбият намудаанд.
Дар Тоҷикистон интихоби ҳамсари муносиб бароям осон набуд. Ва танҳо баъд аз дидор бо ҳамсари имрӯзаам дарк намудам: ҷавоне, ки рӯбарӯям истодааст, аз ҳар лиҳоз бароям шоиставу боиста аст. Аммо ин ҷавон дар яке аз донишгоҳҳои Амрико машғули таҳсили илм (аспирантура) мебошад ва ман бояд аз миёни кор ва зиндагии шахсӣ якеро интихоб кунам.
БАХТ Ё ТАХТ?
-Пас, фикр мекунед, бахт аз тахт беҳтар аст?
-Фикр мекунам, дар Машриқзамин бахти як зан тахти ӯст! Вале ҷудо аз ин, моҳияти масъала дар он нест, ки кадоме аз ин беҳтар ё авлотар аст. Масалан, ман дар давоми солҳои ахир эҳсос менамудам, ки шадидан ба такмили донишу малакаам ниёз дорам ва ҳамакнун пас аз издивоҷ ва ба даст овардани вақти бештар метавонам ин ниятамро амалӣ созам. Тавре ки мегӯянд, мутахассиси такмилёфта ва дорои ҷаҳонбинии васеъ ҳич гоҳ беқадр намемонад.
БОЗГАШТ
-Ҳоло чӣ тасмим гирифтаед: барои якумрӣ дар Амрико хоҳед монд ё ин як ҳиҷрати муваққатист?
-Мо ҳоло муваққатан дар Амрико ба сар мебарем. Баъд аз ба анҷом расидани мӯҳлати такмили таҳсилот ва ба даст овардани таҷрубаи кофӣ, албатта, ният дорем ба кишвари хеш баргардем...
ИНТИХОБИ САРНАВИШТ
-Метавонед дар бораи хонаводаи нави худ ҳам чизе гӯед? Илова ба ин, шавҳари худро чӣ гуна интихоб кардед?
-Албатта, бо камоли майл роҷеъ ба хонаводаи ҷадиди худ нақл хоҳам кард. Азбаски дар ҳақиқат метавонам аз он ҳамчун як хонаводаи қобили ибрат ва намунаи тамоми ҷомеаи Тоҷикистон ном барам. Падари мо китобдӯсттарин ва сермутолиатарин мардеанд, ки дар рӯзгори хеш дидаам. Маҳорати эшон дар ҳунари суханвариву маҳфилороӣ низ беназир аст. Аз рӯйи ихтисос он кас пизишк ва номзади илмҳои тиб мебошанд.
Модарамон номзади илмҳои риёзиянд. Дар яке аз омӯзишгоҳҳои амрикоӣ дарс мегӯянд. Илова ба ин, фаъолтарин бонуи тоҷик дар ташкили корҳои иҷтимоӣ ва мададгору мушкилкушои донишҷӯёни тоҷикистонӣ ва хориҷӣ ҳастанд. Хоҳарамон яке дарс мехонанду дигарӣ кор мекунанд.
Рӯзе ва соате нест, ки дар ин хонадон сухан аз худшиносии миллӣ ва арзишҳои фарҳангии умумибашрӣ наравад. Дар мавриди интихоби шавҳар бояд гӯям, ки худи сарнавишт моро бо ҳам рӯ ба рӯ сохт ва шавҳарам шоири дили мананд!
ОЯНДА ДАР СОЗМОНИ МИЛАЛ
-Ду соли кор дар як ниҳоди давлатӣ чӣ гуна буд? Оё агар дубора баргардед, ҳамин вазифаи худро идома хоҳед дод ё вазифаи дигарро?
-Марҳилаи кор дар идораи давлатӣ дар канори душвориҳо холӣ аз фоида ҳам набуд. Дар ин муддат ман бо инсонҳои бисёр наҷиб шиносоӣ пайдо кардам ва таҷрубаи корӣ андӯхтам. Дертар бархе аз ин одамон ба устодони раҳнамо ва баъзеи дигар ба дӯстони воқеиям табдил ёфтанд.
Масъалаи идомаи кор дар идораи давлатӣ ва ё ҷойи дигар дар қаламрави Тоҷикистон масъалаест хориҷ аз салоҳдиди ман. Зеро агар сухан аз симмати пешинаам равад, ин гуна таъйинот фақат дар ҳадди раҳбарияти олии кишвар аст. Аммо ман эҳсос мекунам, дар кадом гӯшаи дунё, ки набошам наметавонам роҷеъ ба ватани маҳбубам фикр накунам ва мехоҳам ба ҳайси як шаҳрванди содиқ ба ватану миллат саҳми худро дар рушди ободонии он гузорам. Яке аз далоили дигари издивоҷ бо ҳамсарам фикри бози он кас дар нисбати кори озоди минбаъдаи ман низ будааст.
Бо вуҷуди ин, агар мехоҳед хоҳиши худи маро бидонед, бо дарназардошти идомаи кори илмиям дар заминаим сиёсатшиносӣ хеле мехостам дар яке аз дафтарҳои дипломатии кишварамон дар Амрико, масалан, дар дафтари намояндагии Тоҷикистон дар Созмони Милали Муттаҳид ба унвони як мутахассис кор кунам. Вале ҳаққи таъйин кардани як корманд дар ин гуна муассиса вобаста аз Вазорати умури хориҷии Тоҷикистон аст, на ман.
ТАСМИМИ ДУШВОР
-Замоне ки Шумо тасмими рафтан ба Амрикоро гирифтед, муносибат ва бархӯрди раҳбарияти Кумита чӣ тур буд?
-Дубора таъкид месозам, ки ин тасмим тасмими соддаву осон набуд. Ва ростӣ, барои худи ман тарк кардани маҳали кори пешин ва ёру диёри азиз бениҳоят душвор буд. Аҳли кормнадони Кумита низ ҳангоми рафтани ман аз он ҷо дучори ҳамин гуна як вазъият гардида буданд.
ТАНАФФУСИ ЭҶОДӢ
-Аз ин ҳама бигзарем, ҳоло ният ҳаст, ки маҷмӯаи нави шеърҳои Шуморо бихонем? Манзурам, аз Амрико барои мо маҷмуъае наве хоҳед овард ё на?
-Иншооллоҳ, ин рухдоди зебо ба вуқӯъ хоҳад пайваст. Аммо ҳоло дар зиндагии эҷодиям каме таваққуф намудаам. Шояд ба ин далел ки тағйири макони зист кардаам. Вақте даврони мутобиқат комилан пушти сар шуд, итминон медиҳам беш аз пеш хоҳам навишт. Барои он ки ман наметавонам нанависам. Илова ба ин, эҷодкори дур аз меҳан бештар аз бақия роҷеъ ба он мегӯяду мегӯяд...
Комментариев нет:
Отправить комментарий